Donald Trump, forseti Bandaríkjanna, tilkynnti í gærkveldi að Ísrael og Hamas hafi komist að samkomulagi um fyrstu skrefin í átt að friðarsamkomulagi. Stjórnmálaskýrendur telja að þetta sé mikilvægt skref í átt að varanlegum friði, þó að enn sé mikil vinna framundan.
Samkvæmt fréttum frá breska ríkisútvarpinu, BBC, er enn margt óljóst um innihald samkomulagsins. Hins vegar er vitað að um 2.000 palestínskir menn, sem eru í haldi í Ísrael, munu verða leystir úr haldi. Einnig verður 400 flutningabílum með hjálpargögnum hleypt inn á Gaza-svæðið daglega, en þeim mun fjölga á síðar stigum. Hvíta húsið hefur einnig tilkynnt að Hamas muni sleppa 20 gísla sem enn eru á lífi.
Lyce Doucet, fréttamaður BBC, bendir á að þó þetta sé stórt skref sé þetta aðeins byrjunin, þar sem um vopnahlé sé að ræða en ekki endanlegt friðarsamkomulag.
Í yfirlýsingu sagði Benjamin Netanyahu, forsætisráðherra Ísraels: „Þetta er frábær dagur fyrir Ísrael.“ Hann þakkaði ísraelskum hermönnum og Donald Trump fyrir að hafa unnið að lausn gíslanna. „Með hjálp Guðs munum við koma þeim öllum heim,“ bætti hann við.
Donald Trump skrifaði einnig á Truth Social: „Þetta er frábær dagur fyrir arabíska og múslíska heiminn, Ísrael, öll nágrannarríki og Bandaríkin. Við þökkum milligöngumönnum frá Katar, Egyptalandi og Tyrklandi sem unnu með okkur að því að gera þennan sögulega atburð að veruleika.“ Eftir að fyrsti áfangi samningsins verður innleiddur, sagði Trump að Gaza-svæðið verði endurbyggt og meira öryggi tryggt.
Talsmenn Hamas sögðu að samkomulagið muni „binda enda á stríðið á Gaza, tryggja brottför hernámsliðanna, leyfa innflutning mannúðaraðstoðar og fela í sér fangaskipti.“ Þeir bættu við að fólkið á Gaza hafi sýnt óviðjafnanlegt hugrekki og staðhæfðu að þeir muni aldrei yfirgefa þjóð sína né þjóðleg réttindi fyrr en frelsi, sjálfstæði og sjálfsákvörðunarréttur sé tryggður.
