Ace Frehley, gítarleikari og einn af stofnendum KISS, er látinn 74 ára að aldri. Hann lést vegna meiðsla sem hann fékk þegar hann féll í upptökuveri sínu í síðasta mánuði samkvæmt upplýsingum frá fjölskyldu hans.
Í yfirlýsingu fjölskyldunnar kemur fram að hann hafi andast í faðmi ástvina. „Við erum niðurbrotin og harmi slegin. Hann var hlyr, húmoristi og ótrúlega sterkur maður sem skilur eftir sig ómetanlegar minningar. Missirinn er gífurlegur og erfitt að átta sig á honum – minning Ace mun lifa áfram,“ segir í tilkynningunni.
Frehley var fluttur á sjúkrahús eftir slysið í september og lá þar í nokkrar vikur vegna alvarlegrar heilablæðingar. Þarf því að aflysa tónleika hans og hætta við tónleikaferð sem hann átti í að halda á næstunni.
Paul Daniel Frehley, eins og hann hét fullu nafni, fæddist í New York árið 1951. Hann stofnaði KISS árið 1973 ásamt Paul Stanley, Gene Simmons og Peter Criss. Sveitin varð fljótlega heimsþekkt fyrir sviðsframkomu sína, svartan og hvítan andlitsfarða og leðurbúninga, þar sem hver liðsmaður tók sér sitt persónueinkenni; Frehley var þekktur sem Space Ace, Stanley sem Starchild, Simmons sem Demon og Criss sem Catman.
Frehley yfirgaf KISS árið 1982 til að einbeita sér að sólóferli sínu, en sneri aftur þegar upprunalegir liðsmenn fóru í tónleikaferðalag árið 1996. Ferill hans spannaði meira en fimm áratugi, og hann er talinn einn áhrifamesti gítarleikari í rokksögunni.
Hér að neðan má sjá myndband með eftirminnilegustu gítarsólóum Frehleys, sem og tónlistarmyndband við lagið „Talk to Me“ með KISS.
