Steingrímur Birgisson, forstjóri Höld – Bílaleigu Akureyrar, hefur lýst yfir miklum áhyggjum vegna fyrirhugaðrar 66% hækkunar á vörugjöldum á bifreiðar. Í grein sem hann skrifar í Morgunblaðið í dag, bendir hann á að íslensk stjórnvöld hafi í orði kveðnu talað um mikilvægi fyrirsjáanleika í rekstrarumhverfi, en aðgerðir þeirra í raun séu þveröfugar.
Steingrímur segir ferðaþjónustuna vera eina af lykilstoðum íslensks efnahagslífs. Hann vísar í tölur frá Hagstofu Íslands sem sýna að skattspor greinarinnar hafi verið áætlað 155 milljarðar króna árið 2022, en sé nú að nálgast 200 milljarða. „Þetta sýnir svart á hvíta hversu mikilvæg greinin er fyrir samfélagið – og hversu varhugavert það er að ógna henni með vanhugsuðum, ófyrirsjáanlegum og íþyngjandi aðgerðum án nokkurs samtals,“ segir hann.
Hann útskýrir að vörugjöld á bíla skili ríkissjóði um 10 milljörðum á ári, en breytingin á að skila 17 milljörðum á næsta ári. „Þessi breyting á að taka gildi innan örfárra mánaða – í nafni fyrirsjáanleika? Við í bílaleigugeiranum höfum enn ekki fengið skýrar upplýsingar um hvernig þessar hækkarnir verða útfærðar, en miðað við það sem liggur fyrir, þá mun meðalbíllinn okkar hækka um rúmlega 20%.“
Steingrímur varar við því að slíkar hækkanir, í bland við nýjan kílómetragjald og sterka krónu, muni draga úr eftirspurn og gera Ísland óaðlaðandi í samanburði við önnur ferðamannalönd. Hann bendir á að staðan sé raunverulega sú að fyrirtækið sé nú þegar að sjá samdrátt í bókunum fyrir næstu mánuði, að hluta vegna sterkrar krónu og veikingu dollar, evru og punds.
Til að bæta gráu ofan á svart segir Steingrímur að stjórnvöld hyggist einnig innleiða kílómetragjald á alla bíla. „Þessi nýja gjaldtaka mun auka kostnað verulega og er kynnt með afar stuttum fyrirvara. Í samanburði má nefna að Holland og Sviss eru að skoða sambærilegt gjald, en horfa til ársins 2030. Það kallast fyrirsjáanleiki – eitthvað sem skortir verulega á hér á landi.“
Steingrímur segir að um 60% allra ferðamanna leigi bíl og ferðist um landið. Fyrirhugaðar breytingar muni hafa þau áhrif að færri ferðamenn leggi í hringferð um landið og einblíni frekar á suðvesturhornið, sem muni bitna á landsbyggðinni og auka árstíðasveiflur. Hann bendir á að markmiðið sé að þvinga bílaleigur til að kaupa rafbíla í auknum mæli, en eftirspurnin sé einfaldlega ekki til staðar.
„Við þurfum ekki á fleiri hindrunum að halda – sérstaklega ekki þeim sem stjórnvöld geta auðveldlega forðast með samtali og skynsemi,“ segir hann. „Þetta eru arfavitlausar aðgerðir sem munu ekki auka tekjur ríkissjóðs. Þvert á móti draga þær úr útflutningstekjum ferðaþjónustunnar og þar með þeim tekjum sem hið opinbera hefur af henni.“
Steingrímur leggur til að nýta hluta af þessum tekjum í markaðssetningu á Íslandi, sem gæti skilað sér í auknum komum ferðamanna og þar með auknum skatttekjum. „Að kunna að hlusta er kostur. Ef stjórnvöld vilja ekki hlusta á okkur þá er það þeirra val, en þá biðjum við um þá lágmarkskurteisi að okkur sé gefinn að minnsta kosti 12 mánaða aðlögunartími.“
