Matís hefur hafið leit að þátttakendum í rannsókn sem miðar að því að kanna virkni lýsis með viðbættum fríum fitusýrum í baráttunni gegn kvefi og flensum. Rannsóknin er samstarfsverkefni Háskóla Íslands og Lipid Pharmaceuticals ehf. og er áætlað að hefja hana í lok nóvember eða byrjun desember.
Þeir sem taka þátt í rannsókninni munu fá 15.000 krónur í gjafabréf að lokinni rannsókn. Þátttakendum verður skipt í tvo jafnstóra hópa. Annar hópurinn mun fá Omega Cold lýsi til að taka tvisvar á dag í fjóra mánuði, eina skeið (5 til 7 ml) í hvor sinn, á meðan hinn hópurinn mun taka jurtaolíu á sama hátt.
Þátttakendur verða ekki upplýstir um hvort þeir tilheyra lyfjahópnum eða viðmiðunarhópnum. Rannsóknin felur ekki í sér að þátttakendur breyti neinu öðru í neyslu eða hegðun sinni, nema að taka olíuna og skrá heilsufarsupplýsingar. Ef þátttakendur eru vanir að taka hefðbundið lýsi eða önnur fæðubótar efni, eru þeir hvattir til að halda því áfram, auk þess að taka olíuna fyrir rannsóknina.
Í rannsókninni verða þátttakendur beðnir um að skrá upplýsingar um heilsufar, sérstaklega með tilliti til kvef- og flensueinkenna, vikulega í fjóra mánuði með stuttum spurningalistum. Rannsóknin er fyrsta skrefið í því að kanna hvort lýsi með fríum fitusýrum geti hindrað framgang Covid-19 og kvefs í fólki.
Lýsið sem er algengast á markaði í dag hefur verið hreinsað af svokölluðum fríum fitusýrum. Omega Cold lýsið sem notað verður í rannsókninni hefur verið hreinsað en inniheldur fríar fitusýrur, svipað því sem áður var. Rannsóknir á vegum Lipid Pharmaceuticals ehf. í Bandaríkjunum sýndu að lítið magn þessara fitusýra í tilraunaglösum drap veirur sem valda COVID-19 og kvefi.
Jurtaolían sem notuð verður í rannsókninni er hreinsuð sólblómaolía með háu hlutfalli af omega-9 fitusýrum. Bæði lýsið og jurtaolían verða með sítrónubragði. Áður en rannsóknin hefst verða þátttakendur beðnir um að svara spurningum um almennt heilsufar, líðan, sjúkdómasögu, lyfjanotkun, neyslu á fæðubótar efnum, mataræði, munn- og tannheilsu, hreyfingu, tóbaks- og áfengisnotkun, félagshegðun, almenna heilsu og smitvarnir, ásamt spurningum um kyn, aldur, fjölda og aldur barna, atvinnuþátttöku og menntun.
