Í dag fara fram þingkosningar í Argentínu, sem munu skera úr um hvort helstu stefnumál forsetans Javier Milei nái fram að ganga. Kosningarnar eru hluti af miðkjörtímabilinu þar sem kosið verður í helming þingsæta í neðri deild og einn þriðjung í efri deild þingsins.
Kjörstaðir opnuðu klukkan 11:00 að íslenskum tíma og munu vera opnir til klukkan 21:00. Javier Milei sigraði í forsetakjörinu fyrir tveimur árum með 56% atkvæða í seinni umferð, en flokkur hans, Frelsið í forgrunni (sp. La Libertad Avanza), hefur ekki náð jafn góðu gengi í þingkosningunum. Þingið hefur staðið í vegi fyrir mörgum af hans helstu stefnumálum, þar á meðal einkavæðingu á stærsta flugfélagi landsins, ríkisreknu orkufyrirtæki og kjarnorkuverum.
Áætlað er að flokkur Milei muni auka þingmenn sína, en líklegt er að hann nái ekki hreinum meirihluta. Forsetinn hefur þó náð að skera niður um tug þúsunda starfa í opinbera geiranum og dregið verulega úr kostnaði á ýmsum sviðum. Verðbólga hefur lækkað úr yfir 200% niður í 30% á tíð Milei, en hagvöxtur í landinu hefur þó dregist saman.
„Það er ekki hægt að bæta upp fyrir hundruð ára niðurníðslu á tæpum tveimur árum,“ sagði Milei um gagnrýni á stjórn sína fyrr í vikunni. Aftur á móti hefur ánægja almennings með störf hans dregist saman, m.a. vegna erfiðleika í tengslum við gengi argentíska pesósins. Fyrir skömmu studdi Donald Trump, forseti Bandaríkjanna og bandamaður Milei, við bakið á honum með því að senda stuðning upp á 40 milljarða dala.
„Ef Milei tapar þessum kosningum munum við ekki verða gjafmild við Argentínu,“ sagði Trump fyrr í vikunni. Kosningarnar í dag munu því vera lykilatriði í því að ákvarða framtíð Milei og stefnu hans í Argentínu.
