Rúnar Kristinsson, þjálfari karlaliðs Fram, var gestur Helga Fannars Sigurðssonar í nýjasta þætti af Íþróttavikunni á 433.is. Rúnar hefur ekki dregið úr því að hann er ekki ánægður með núverandi fyrirkomulag Bestu deildarinnar, þar sem deildinni er skipt í efri og neðri hluta eftir 22 leikja mót.
Hann leiddi sitt lið inn í efri hlutann á nýafstöðnu tímabili, en að hans sögn breytti það ekki afstöðu hans til deildarinnar. „Það eru allt of margir leikir þar sem markatalan og úrslitin eru bara skrytin, því að það er minna undir og mönnum nokk sama,“ sagði Rúnar. „Vægið verður svo ójafnt, því miður. Afturelding fer til dæmis upp á Skaga og ÍA hefur að engu að keppa. Þeir lögðu allt í leikinn og unnu hann, en þeir hefðu hæglega getað spilað öllum þeim sem höfðu ekki spilað í sumar og gefið Aftureldingu leikinn. Það hefði getað kostað Aftureldingu og KR sæti í deildinni.“
Rúnar benti á að KSÍ setti saman rýnihóp í haust til að skoða hvernig fyrstu fjögur ár fyrirkomulagsins hafi gengið. Hann furðar sig á því að enginn þjálfari sé í þeim hópi. „Er einhver þjálfari í þeim rýnihóp? Það er það sem mér finnst alltaf svo skrytið með KSÍ, mótanefnd sem er að setja upp mót og alla þessa hluti. Það er aldrei rætt við þjálfara sem hafa verið í deildinni í 5-10 ár og hafa skoðanir á hlutunum,“ sagði Rúnar. „Þeir sem standa í þessu stappi alla daga vita hvernig álagið er á leikmönnum, hvernig þeir hugsa og við þurfum að undirbúa okkar menn. Ég held að það væri allt í lagi að fá þeirra álit, fá þá með í svona nefndir. Ég held að þeir geti rýnt jafnvel betur í hlutina en stjórnarmenn sem horfa í krónur og aura eða utanaðkomandi áhugamenn um fótbolta.“
Heildarviðtalið er að finna í þættinum, sem má nálgast í spilaranum hér ofar, sem og á helstu hlaðvarpsveitum.
