Lögreglan á höfuðborgarsvæðinu hefur hafið rannsókn á stórtæku fjársvikamáli sem kom í ljós um helgina. Samkvæmt heimildum fréttastofu leitaði lögreglan eftir gæsluvarðhaldi yfir fimm mönnum tengdum rannsókninni, en hérðasdómur hafnaði þeirri beiðni. Hins vegar voru mennirnir úrskurðaðir í farbann.
Stefán Örn Arnarson, aðstoðaryfirlögregluþjónn í fjármunabrotadeild lögreglunnar, staðfesti þessa upplýsingar. Umfang fjársvikanna er ekki enn að fullu þekkt, en heimildir fréttastofu benda til þess að fjárhæðirnar geti hlaupið á hundruð milljóna króna. Mennirnir eru grunaðir um að hafa nýtt sér kerfisgalla hjá Reiknistofu bankanna til að svíkja fé frá fjármögnunaraðilum.
Samkvæmt upplýsingum frá Reiknistofu bankanna kom upp tímabundinn veikleiki við nýlegar kerfisuppfærslur. Þessi veikleiki leiddi til þess að undir ákveðnum aðstæðum gátu sumir einstaklingar millifært fjármuni af eigin reikningum án þess að inneign væri til staðar. Þegar svikin voru uppgötvuð var strax lokað fyrir þessa möguleika.
Í tilkynningu frá Reiknistofu bankanna kemur fram að öryggismál séu í forgangi og að stofnunin leggi mikið upp úr því að koma í veg fyrir misnotkun á kerfum sínum. „Í þessu tilfelli var illur ásetningur notaður til að misnota þetta tímabundna ástand í kerfinu sem varð til við uppfærslu. Þetta er enn ein áminningin um mikilvægi öryggismála sem eru í stöðugri endurskoðun,“ segir í tilkynningunni.
Málið er nú komið í viðeigandi farveg, en rétt er að taka fram að viðskiptavinir bankanna hafa ekki orðið fyrir tjóni vegna málsins.
