Framherjinn Milutin Osmajic, sem leikur með Preston, hefur verið úrskurðaður í níu leikja bann eftir að hann var talinn hafa beitt Hannibal Mejbri, leikmanni Burnley, kynþáttaniði. Atvikið átti sér stað í leik liðanna í Championship-deildinni í febrúar, þar sem Mejbri sakaði Osmajic um rasiska ummæli.
Osmajic hafnaði ásökuninni harðlega og neitaði sök. Eftir að Knattspyrnusamband Englands (FA) ákærði hann, komst aganefnd FA að þeirri niðurstöðu að leikmaðurinn hefði hegðað sér ósæmilega, notað móðgandi og niðrandi orð í garð andstæðings. Nú hefur aganefndin staðfest að brotið sé sannað og Osmajic, landsliðsmaður Svartfjallalands, mun afplána níu leikja bann.
Í yfirlýsingu FA kom fram að málið fellur undir svokallað „aukið brot“, þar sem ummælin voru talin hafa átt sér skírskotun til litarháttar eða kynþáttar samkvæmt reglugerð E3.2. Preston og Osmajic hafa ekki tjáð sig frekar um niðurstöðuna.
