Mikil stemning ríkti í Borgarleikhúsinu í kvöld þegar yfir tvö hundruð nemendur úr átta skólum stigu á svið í Skrekk 2025, hæfileikakeppni grunnskóla í Reykjavík. Eftir keppnina var það Fellaskóli sem stóð uppi sem sigurvegari með atriðið „Þrýstingsbylgja“.
Í öðru sæti kom Árbæjarskóli með atriðið „5:00“ og í þriðja sæti var Langholtsskole með sýninguna „Meira en nóg“. Fellaskóli hlaut einnig Skrekkstunguna, sérstök verðlaun fyrir atriði sem þykir skara fram úr í skapandi notkun íslensku. Markmiðið með þessum verðlaunum er að stuðla að jákvæðum viðhorfum til íslenskunnar og draga fram möguleika tungumálsins í skapandi starfi.
Kynnar kvöldsins voru þau Salka Gustafsdóttir og Bjarni Kristbjörnsson. Í dómnefnd kvöldsins sátu: Styrmir Steinn Sigmundsson, fulltrúi ungmennaráðs Samféss, Andrean Sigurgeirsson, dansari og danshöfundur hjá íslenska dansflokknum, Elísabet Indra Ragnarsdóttir, verkefnastjóri dagskrárgerðar í Hörpu, Mikael Emil Kaaber, leikari hjá Borgarleikhúsinu, og Kristinn Óli S. Haraldsson, leikari og tónlistarmaður og fulltrúi Þjóðleikhússins.
Tónlistarmaðurinn Herra Hnetusmjör steig einnig á svið og flutti Skrekkslag ársins, sem að þessu sinni var lag hans Elli Egils. Hægt er að horfa á viðtal við sigurvegarana hér fyrir neðan.
