Bandaríkin munu grípa til aðgerða gegn útlendingum sem hafa „lofað, réttlætt eða gert lítið úr“ andláti Charlie Kirk, samkvæmt upplýsingum frá háttsettum embættismanni innan utanríkisráðuneytisins. Aðstoðarutanríkisráðherrann Christopher Landau skrifaði á X í morgun að útlendingar sem vegsama ofbeldi og hatursfullar skoðanir séu ekki velkomnir í Bandaríkjunum.
Landau greindi frá því að hann hefði þegar beint því til ræðismanna að grípa til viðeigandi aðgerða. Hann bað netverja um að benda á athugasemdir eða færslur þar sem lítið er gert úr voðaverkinu. Charlie Kirk var skotinn til bana í Utah Valley-háskólanum í gær, þar sem hann var mættur til að ræða við ungmenni um stjórnmál. Morðið hefur vakið mikinn óhug í Bandaríkjunum.
Talsmaður utanríkisráðuneytisins staðfesti við The Guardian að ríkisstjórn Donald Trump sé einhuga um að ekki eigi að gefa út dvalarleyfi til einstaklinga sem hafa skoðanir sem ekki eiga heima í Bandaríkjunum. Þetta er í samræmi við fyrri aðgerðir stjórnvalda, sem hafa meðal annars falið landamæravörðum að rannsaka erlenda háskólanema sem hafa lýst yfir stuðningi við Palestínu eða gagnrýnt Ísrael á samfélagsmiðlum.
Einnig hafa þessir aðilar leitað í samfélagsmiðlum útlendinga til að kanna hvort þeir hafi þar gagnrýnt núverandi forseta eða ríkisstjórn hans. Donald Trump fordæmdi morðið í gær og kenndi öfgavinstrinu um. Margir bandamenn hans hafa komið með svipaðar yfirlysingar. Athygli hefur verið vakin á því að hvorki Trump né bandamenn hans hafi brugðist við af sömu hörku þegar þingkona í Minnesota, Melissa Hortman, og eiginmaður hennar voru skotin til bana í júní.
