Jóhannes Óli Sveinsson, nýkjörinn forseti Ungs jafnaðarfólks, lýsir því sem „mögnuð tilfinning“ að leiða hreyfinguna. Þetta kom fram í samtali hans við fréttastofu eftir landsþing Ungs jafnaðarfólks sem fór fram í dag á Center Hotels Miðgarði. Jóhannes Óli, 22 ára hagfræðinemi, var sjálfkjörinn forseti eftir að sitjandi forseti, Lilja Hrönn Önnudóttir Hrannarsdóttir, dró framboð sitt til baka á síðustu stundu.
Jóhannes, sem oft er kallaður Jóli, greindi frá því að stemningin á þinginu hefði verið mjög góð, en yfir hundrað manns voru á staðnum þegar mest var.
Á þinginu sátu Kristrún Frostadóttir, forsætisráðherra, og Jóhann Páll Jóhannsson, umhverfis-, orku- og loftslagsráðherra, í svokölluðu „Ráðherragrilli“. Jóli sagði að spurningarnar sem voru bornar upp hefðu verið misalvarlegar, en margar þeirra hafi verið mjög krefjandi. „Það var smá flipp en of lítið fyrir minn smekk,“ bætti hann við.
Stærsta áhersluatriði Jóla er að stækka hreyfingu Ungs jafnaðarfólks og koma henni betur að framfæri. Hann tók fram að mikill samhljómur hafi verið meðal fundargesta um þetta. Sérstaklega vill hann virkja yngsta fólkið, fólk á aldrinum 16 til 20 ára.
Næsta skref í starfi Jóla er að aðlagast forsetahlutverkinu. Sveitastjórnarkosningar í vor eru næsta stóra verkefni hreyfingarinnar, og að hans sögn hefur væntinginn til þeirra aukist á landsþinginu. „Framtíðin er björt hjá ungu jafnaðarfólki,“ sagði Jóli. „Það eru öll velkomin.“
Landsþingið samþykkti einnig stjórnmálaályktun þar sem Ungt jafnaðarfólk krefst þess að ríkisstjórn Kristrúnar Frostadóttur setji vexti og verðbólgu, húsnæðismál og geðheilbrigðismál á oddinn á komandi þingvetri. Einnig veitti nýkjörinn forseti félagshyggjuverðlaun Ungs jafnaðarfólks til félagsins Ísland-Palestína, þar sem Hjálmtýr Heiðdal, formaður félagsins, tók við verðlaununum.
Auk þess var ný framkvæmdastjórn Ungs jafnaðarfólks kjörin á þinginu, en í henni sitja: Jóhannes Óli Sveinsson, Lilja Hrönn Önnudóttir Hrannarsdóttir, París Anna Bergmann, Soffía Svanhvít Árnadóttir, Brynjar Bragi Einarsson, Egill Örnuson Hermannsson, Elmar Gísli Gíslason og Skúli Hólm Hauksson.
