Opus 109 er titill plötu sem píanistinn Víkingur Heiðar Ólafsson sendir frá sér 21. nóvember. Tilkynnt var um útgáfuna í morgun og eins og áður kemur hún út hjá Deutsche Grammophon.
Titill plötunnar vísar til sónötu nr. 30, opus 109, sem Ludwig van Beethoven samdi seint á ferli sínum. Verkið er í lykilhlutverki á plötunni í samspili við nokkur verk eftir Johann Sebastian Bach og lítt þekkta sónötu eftir Franz Schubert.
Í fréttatilkynningu frá Deutsche Grammophon kemur fram að Víkingur haldi á nýju plötunni áfram að skapa samtal milli ólíkra tónskálda og tímabila í tónlistarsögunni. Þar segir að eftir alþjóðlega velgengni Goldberg-tilbrigðanna í flutningi Víkings hafi áhrif fjölradda tónsmíða Bachs á lokasónötur Beethovens orðið að spennandi upphafspunkti fyrir næsta verkefni píanóleikarans.
„Þegar ég fór að rannsaka hugmyndir að næsta verkefni mínu dróst ég strax að safni verka þar sem mér fannst ég finna fyrir nærveru Goldberg-tilbrigðanna á mjög innblásandi hátt,“ segir Víkingur í tilkynningunni og vísar til síðustu þriggja sónata Beethovens, þ.e. opus 109, 110 og 111.
„Eftir nokkra daga í stúdíóinu mínu ákvað ég að hætta við þá margreyndu hugmynd að taka þessar þrjár frábæru lokasónötur upp og gefa þær saman út á einni plötu,“ bætir hann við og bendir á að fjöldi píanista hafi áður tekið upp þessi þrjú systurverk.
„Í mínum huga fannst mér það að spila og hlusta á allar þrjár sónöturnar í röð ekki endilega besta leiðin til að nálgast verkin á þessum tímapunkti,“ segir Víkingur. „Með því að velja að hafa eina sónötu í forgrunni gafst mér skemmtilegt tækifæri til að ferðast um braut verksins og uppgötva ný sjónarhorn á því, samtímis því að rekast á önnur tengd verk.“
Blaðamaður menningardeildar Morgunblaðsins hlýddi nýverið á tóndæmi af plötunni í nýrri vinnustofu Víkings, og er útgáfa væntanleg 21. nóvember.
Víkingur fylgir plötunni eftir með tónleikum víða um heim á næstu mánuðum. Meðal viðkomustaða eru Louisiana í Danmörku, Óperuhúsið í Osló, Konzerthaus í Hannover, Philharmonie í Berlín, Elbphilharmonie í Hamborg og Konzerthaus í Vín.
Aðspurður segist Víkingur munu leyfa íslenskum áheyrendum að heyra Opus 109 á útgáfutónleikum í Eldborg Hörpu í byrjun aprílmánaðar 2026.
Ljósmyndir: mbl.is / Eggert Jóhannesson & Ari Magg
