Arna Sif Ásgrímsdóttir, varnarmaður Vals, sneri aftur á knattspyrnuvöllinn í dag eftir meiðsli og barnsburð. Hún tók þátt í jafnteflinu gegn FH þar sem niðurstaðan var 1:1 í fyrsta leik efri hluta Bestu deildar kvenna í Kaplakrika.
Þetta var fyrsti deildarleikur Örnu í tæp tvö ár, en hún spilaði síðast 6. október 2023. „Tilfinningin er bara ótrúlega góð, ég er bara frekar stolt af mér í dag ef ég á að vera alveg hreinskilin,“ sagði Arna eftir leikinn.
Hún hafði áður verið á bekknum í undanfarandi leikjum, en í dag var hún sett beint í byrjunarliðið. „Þetta var ekki planað með löngum fyrirvara og kom svolítið flatt upp á mig. Það eru þrír leikir síðan ég fékk grænt ljós á að fara að fá einhverjar mínútur, þannig að maður sá kannski fyrir sér korter hér og 10 mínútur þar. En það er fínt líka að henda sér bara beint í dýfuna,“ bætti hún við.
Arna spilaði 77 mínútur í leiknum og stóð sig vel, þó að hún hafi fundið fyrir smá þreytu undir lokin. „Maður er auðvitað kröfuharður og vill alltaf vera helst gallalaus. Heilt yfir var þetta bara fínt og svo hentaði það mér mjög vel í dag að vera í þessu kerfi með mjög góðum leikmönnum í kringum mig. Ég er bara sátt,“ sagði hún.
Í seinni hálfleik hafði FH mikla yfirburði og kom niður á Valsliðinu. „Þetta var að verða pínu þreytt, mér fannst þetta of einfalt. Þetta var bara leið eitt í gegn og þær voru komnar í færi. Þetta var pínu pirrandi en mér fannst við samt sem áður leysa þetta og svo náttúrulega bjargar Tinna okkur tvisvar eða þrisvar mjög vel.“
Heilt yfir hefur tímabilið verið mikil vonbrigði hjá Val, en eins og áður kom fram hefur Arna ekkert tekið þátt fyrr en nú. „Það hefur verið gríðarlega erfitt. Bæði að horfa upp á mína konur strögla og geta ekkert gert til að hjálpa þeim. Það hefur verið mjög erfitt en mikið hrós á þær og seiglu þeirra að vera búnar að rétta aðeins úr kútnum núna seinni hlutann. Það hefur verið stigandi í þessu og þær eiga hrós skilið fyrir það.“
Valur á fjóra leiki eftir af mótinu, en liðið hefur að litlu að keppa. „Við kannski klifrum ekkert mikið hærra en við ætlum bara að reyna að hafa svolítið gaman af þessu og reyna að safna eins mörgum stigum og mögulegt er. Þetta tímabil fer ekkert í sögu bækur og flestir vilja bara skilja það eftir, þannig það er mjög mikilvægt að ná að enda það á góðum nótum og koma fljúgandi inn í næsta,“ sagði Arna að lokum.
