Haraldur Freyr Guðmundsson, þjálfari Keflavíkur í fótbolta, var jákvæður þegar hann ræddi við mbl.is á blaðamannafundi fyrir leikinn gegn HK. Leikurinn fer fram klukkan 16.15 í dag á Laugardalsvellinum og er um laust sæti í Bestu deildinni.
Haraldur lýsti undirbúningi liðsins sem hefðbundnum og sagði: „Það er hefðbundin æfingavika hjá okkur og við breytum engu. Við æfum bæði dagana og verðum tilbúnir í leikinn. Meiri áhersla er lögð á endurheimt frekar en alvöru æfingar, svo við leggjum línurnar taktískt á morgun, síðan erum við tilbúnir á laugardaginn.“
Hann minntist einnig á fyrri úrslitaleik liðsins í fyrra, þar sem þeir töpuðu fyrir Aftureldingu með minnsta mun. „Ég held að það geti hjálpað okkar leikmönnum að koma hingað og upplifa vonbrigðin í fyrra. Við vorum grátlega nálægt því að fara alla leið. Við enduðum mótið í 2. sæti, stigi á eftir ÍBV,“ sagði hann. „Menn voru mjög sárir, leikmenn vilja ekki upplifa þá tilfinningu aftur. Það er mikil orka og mikið hungur í mínum leikmönnum að fara alla leið í ár.“
Þrátt fyrir misjafnt gengi í sumar, þar sem Keflavík var inn og út úr umspilssætunum, er liðið ákveðið í að tryggja sig í úrslitaleik. „Þegar deildin sjálf er búin, skiptir ekki öllu máli hvort þú ert í sæti 2, 3 eða 5. Þú ert bara komin í undanúrslit og ferð í einvígi. Þetta er nýtt mót og sigurvegarinn fer í úrslitaleik um það að komast upp um deild,“ sagði Haraldur, sem vonast til að liðið geti nýtt sér reynsluna frá fyrra ári.
Spurður um leikstílinn framundan, sagði hann: „Hátt spennustig gerir það oft að verkum að leikirnir byrja rólega, liðin eru að þreifa fyrir sér í upphafi, þannig má búast við því. En auðvitað vonumst við eftir fjörugum og skemmtilegum leik, með mörgum mörkum. Það verður fullt af fólki í stúkunni og við vonumst eftir góðri skemmtun. En fyrst og fremst þá býst ég við jafnum leik.“
