ÍBV og Vestri mættust í öðrum leik neðri hluta Bestu deildar karla í fótbolta á Ísafirði í dag. Eyjamenn sóttu stigin þrjú af miklu öryggi og unnu með sannfærandi 5-0 sigur.
Fyrsta mark ÍBV kom á tíundu mínútu þegar Sigurður Arnar Magnússon skoraði með skallamarki eftir aukaspyrnu. Hermann Þór Ragnarsson bætti síðan við tveimur mörkum á fimm mínútna millibili, fyrst á 41. mínútu og svo aftur á fyrstu mínútu uppbótartíma. Eyjamenn fóru langleiðina með að tryggja sigurinn í fyrri hálfleik, því Oliver Heiðarsson skoraði fjórða markið áður en gengið var til búningsklefa.
Hermann Þór hafði ekki sagt sitt síðasta, því hann bætti við sínu þriðja marki á 84. mínútu, sem staðfesti 5-0 sigur ÍBV. Hermann Þór Ragnarsson skoraði þrjú mörk fyrir ÍBV í dag.
Hvað þýða úrslitin fyrir liðin? ÍBV er nú efst í neðri hluta deildarinnar með 33 stig og er komið langt með að tryggja áframhaldandi sæti í Bestu deildinni. KA er í öðru sæti neðri hlutans með 32 stig og á leik til góða við Aftureldingu, sem hefst klukkan 16:00 í dag.
Vestramenn eru í kröppum dansi í fallbaráttunni, en þó eru þrjár umferðir eftir. Liðið er með 27 stig í fjórða sæti, þremur stigum á undan KR sem er í fallsæti. Liðin munu mætast í lokaumferð deildarinnar.
