Að minnsta kosti 40 manns létust í troðningi á stjórnmálafundi í suðurhluta Indlands í gær. Fundurinn fór fram í Karur-héraði í Tamil Nadu, þar sem Vijay, leikari og stjórnmálamaður, ávarpaði stuðningsmenn sína.
Samkvæmt yfirlýsingu M.K. Stalin, ráðherra Tamil Nadu, voru níu börn meðal látnanna, auk 17 kvenna og 13 karla. Einnig var 51 einstaklingi flutt á sjúkrahús samkvæmt fréttum BBC um málið.
Í kjölfar atviksins hefur lögreglan höfðað mál á hendur þremur æðstu fulltrúum flokks Vijays, TVK, vegna hugsanlegs manndráps af gáleysi. Lögreglustjóri sagði að flokknum hefði verið veitt leyfi til að halda samkomu með 10 þúsund manns, en fjöldinn reyndist vera tvofalt meiri.
Ræðuhald Vijays var stöðvað þegar mannfjöldinn óx skyndilega. Myndskeið frá fjölmiðlum sýna meðal annars fólk falla í yfirlið í þröngunni.
Yfirvöld hafa heitið bótum til aðstandenda látnanna, sem nema einni milljón rúpiða, eða um 1,5 milljónum króna. Einnig verður hafin rannsókn á atvikinu.
Í yfirlýsingu á samfélagsmiðlum sagði Vijay að hjarta hans væri „brotið“ og að hann upplifði „óþolandi, ólýsanlegan sársauka og sorg.“ Hann vottaði fjölskyldum hinna látnu samúð sína og óskaði þeim sem særðust skjótan bata.
Narendra Modi, forsætisráðherra Indlands, lýsti atvikinu sem „sorglegu“ og „djúpstæðu áfalli.“ Banvænir troðningar eru ekki óalgengir á Indlandi og hafa nokkur slík atvik orðið á þessu ári, meðal annars á Kumbh Mela-hátíðinni og fyrir utan krikketleikvang eftir viðureign í krikket.
