Jared Kushner og fjárfestingarfélag hans hafa náð samkomulagi um kaup á Electronic Arts (EA) fyrir 55 milljarða dala. Þessi framkvæmd er talin vera stærsta skuldsetta yfirtöka í sögunni, samkvæmt umfjöllun Financial Times.
Samkvæmt samkomulaginu munu hluthafar EA fá 210 dali fyrir hvern hlut, sem er 25% álag á gengi félagsins eins og það var á fimmtudaginn síðastliðinn, daginn áður en orðrómur um yfirtökurnar hófst. Til samanburðar fór gengi EA hæst í 179 dali um miðjan ágúst.
Fjárfestahópurinn, sem samanstendur af PIF, þjóðarsjóði Sádi-Arabíu, Silver Lake og Affinity Partners, hyggst fjármagna kaup sín með 36 milljarða dala eiginfjárframlagi, sem felur meðal annars í sér núverandi 9,9% hlut PIF í EA, auk 20 milljarða dala láni frá JPMorgan.
Kushner sagði í tilkynningu um kaupin að EA væri einstakt fyrirtæki með djarfa sýn fyrir framtíðina og stjórnendur í efsta gæðaflokki. Hann benti á að hann hefði alist upp við að spila leiki EA, þar á meðal EA Sports FC (fyrrum FIFA), Madden NFL og The Sims.
Heimildir Financial Times greina frá því að fjárfestahópurinn sé að veðja á að gervigreind geti dregið verulega úr rekstrarkostnaði EA. Með þessu sé fyrirtækið betur í stakk búið til að taka á sig aukna skuldabyrði, þar sem EA hefur hingað til verið með hóflegar skuldir.
Kushner spilaði lykilhlutverk í að landa þessum samningi, og hann og Egon Durban, annar forstjóri Silver Lake, hófu að kanna möguleika á yfirtöku fyrr á árinu. Heimildarmenn FT staðfesta að Kushner hafi verið mikilvægur í að sannfæra PIF um að taka þátt í þessari yfirtöku, á sama tíma og þjóðarsjóðurinn er að draga úr vægi óskráðra eigna.
