Drew Scanlon, maðurinn á bak við eitt af þekktustu „meme“-um internetsins, hefur nýverið notað frægð sína til að vekja athygli á góðu málefni. Myndin, þar sem hann blikkar augunum í vantrú, hefur verið áberandi á netinu síðan hún birtist fyrst árið 2017.
Scanlon, sem býr í San Francisco, er nú 39 ára gamall og hefur stigið fram í þeirri von að nýta þessa vinsælu mynd til að safna fé fyrir National MS Society. Um helgina skrifaði hann færslu á X, þar sem hann hvatti fólk til að styrkja samtökin, sem vakti mikla athygli og fékk yfir 400 þúsund læk.
„Hæ internet! Ég heiti Drew og ÞETTA ER ANDLITIÐ MITT,“ skrifaði hann við hlið hinnar goðsagnakenndu klippu. „Ef þetta GIF hefur nokkurn tíma fært þér gleði, bið ég þig auðmjúklega að íhuga að styrkja National MS Society. Það myndi þýða mikið fyrir mig og þá sem ég þekki sem þjást af sjúkdómnum,“ bætti hann við, en tveir góðir vinir hans eru með MS.
Þrátt fyrir að vera þekktur fyrir þetta meme, segist Drew aldrei hafa sóst eftir að græða á því, enda hafði hann enga hugmynd um að andlit hans væri notað á þennan hátt. Samkvæmt heimildum hefur söfnun hans gengið vel og hafa milljónir króna safnast á nokkrum dögum.
Scanlon hefur áður starfað sem vídeóklippari hjá Giant Bomb og segir að meme-ið eigi rætur að rekja til ársins 2013, þegar hann var að taka upp þáttinn Unprofessional Fridays. Það var þáttur um tölvuleiki, og viðbrögðin hans voru alveg náttúruleg þegar félagi hans sagði eitthvað óviðeigandi.
Auk þessa hefur Drew einnig haldið úti tveimur hlaðvörpum, annars vegar um kvikmyndir og hins vegar um Formúlu 1, þar sem hann deilir hugsunum sínum og reynslu.
