Á Íslandi greinast á hverju ári um 260 konur með brjósta-krabbamein, sem er algengasta krabbameinið meðal kvenna. Þrátt fyrir mikilvægi reglubundinnar skimunar mættu aðeins um 61 prósent kvenna í skimun á síðasta ári, á meðan að meðaltal annarra Norðurlanda er um 80 prósent. Til að bregðast við þessari þróun hafa Krabbameinsfélag Íslands og tryggingafélagið TM hafið samstarf til að auka þátttöku kvenna um allt land.
Samkvæmt tilkynningu frá þessum aðilum er mæting í skimanir mismunandi eftir landshlutum, aldri og uppruna. Markmið átaksins er að draga úr þessum mun með fjölbreyttum aðferðum. „Með reglubundinni skimun aukast líkurnar á að krabbamein greinist fyrr og á vægari stigum, sem bætir horfur og árangur meðferðar,“ segir í tilkynningunni.
TM og Krabbameinsfélagið munu einnig vinna saman að endurskoðun á skilmálum sjúkdómatrygginga, svo að þeir taki mið af þörfum þeirra sem greinast með krabbamein. TM hyggst endurgreiða einn mánuð af iðgjaldi sjúkdómatryggingar fyrir viðskiptavini sem nýta boð í brjóstaskimun. „Það er sláandi hversu lágt hlutfall kvenna nýtir boð í skimun. Við hvetjum allar konur til að mæta þegar þær fá boð og vonum að þessi aðgerð skapi enn meiri hvata. Við getum hækkað hlutfallið saman og þannig lækkað dánartíðni vegna brjósta-krabbameins,“ segir Birkir Jóhannsson, forstjóri TM.
Halla Þorvaldsdóttir, framkvæmdastjóri Krabbameinsfélagsins, fagnar þátttöku TM í forvarnarstarfinu. „Það getur raunverulega bjargað mannslífum,“ bætir hún við.
Konur á aldrinum 40–74 ára geta pantað tíma hjá Brjóstamiðstöð Landspítala í síma 543 9560 milli kl. 9.30 og 15.30 á virkum dögum eða á vefsíðu Brjóstamiðstöðvarinnar. Næstu skimanir á landsbyggðinni fara fram á Eskifirði 20.-24. október, Hvolsvelli 27.-28. október, Selfossi 3.-14. nóvember og í Reykjanesbæ 24.-28. nóvember. Til að virkja endurgreiðslu hjá TM nægir að senda kvittun fyrir komugjaldi í skimun ásamt nafni og kennitölu á [email protected].
