Rúnar Hroði Geirmundsson, einkaþjálfari og fyrrum Evrópu- og heimsmeistari í kraftlyftingum, hefur að undanförnu æft af miklum krafti fyrir keppni í járnkarli á næsta ári. Hann vonast til að safna 12-18 milljónum króna fyrir vökudeild Barnaspítala Hringsins.
Þó kom að því að Rúnar veiktist alvarlega á dögunum, en hann greinir frá reynslu sinni á Facebook. Rúnar hefur búið á Selfossi í eitt og hálft ár ásamt fjölskyldu sinni, og er hann mjög ánægður með þá ákvörðun. Hann leitaði sér aðstoðar hjá Heilbrigðisstofnun Suðurlands og er himinlifandi með þjónustuna sem hann fékk.
„Fyrir átta dögum veikist ég alvarlega, og í takt við mig bið ég aldrei um hjálp, þar til Eyrún, kona Rúnar, dregur mig á asnaeyrum til læknis á fjórða degi. Hún hringir um morguninn og fær tíma á hádegi. Á fimmta degi segir hún stopp og fer með mig á bráðamóttökuna, þar sem hún hótar sjúkrabíl,“ skrifar Rúnar.
Hann var lagður inn í hvelli og fékk allt sem hann þurfti, á öllum stundum, án þess að þurfa að bíða. Hann fékk æðalegg og verkjalyf, CT skanna strax og ómun líka. „Erfiðlega gekk að finna svör og var ég að endanum tekinn af öllum mat og fékk bara næringu, vatn og sykur í æð. Mér var haldið í þrjá daga í innlagn í einangrun í nýju flottu herbergi,“ bætir Rúnar við.
Hann dásamar einnig læknana og hjúkrunarfræðingana sem hlúðu að honum og bendir á að honum hafi ekki skort neitt á meðan öllu stóð. Rúnar bendir á að veikindin séu alvarleg og hann mun þurfa að glíma við þau í talsverðan tíma til að ná fyrri heilsu.
Að auki nefnir Rúnar að hann hafi fyrst og fremst orðið var við væl og tuð yfir heilbrigðiskerfinu, og að fólk sé að mestu hætt að hrósa því sem vel er gert. Því vill hann deila jákvæðri reynslu sinni. „Takk fyrir mig Heilbrigðisstofnun Suðurlands, þið björguðuð lífi mínu alveg klárlega, og ekki kostaði það mig neitt, nema kannski heilsuna tímabundið,“ skrifar afreksmaðurinn Rúnar Hroði.
