Jóhann Berg Guðmundsson, leikmaður Al Dhafra, hefur tjáð sig opinberlega eftir að hann var ekki valinn í íslenska landsliðshópinn sem kynntur var í gær. Fyrir marga kom það á óvart að Jóhann, sem hefur leikið 99 landsleiki fyrir Ísland, var ekki á listanum, sérstaklega þar sem hann hefur ekki verið valinn eftir að Arnar Gunnlaugsson tók við þjálfun landsliðsins.
Jóhann hefur verið frá vegna meiðsla, en nú er hann heill heilsu. Hann skrifaði á Instagram: „Landsliðið í golfi næst á dagskrá.“ Samkvæmt ummælum landsliðsþjálfarans í gær er óvíst hvort Jóhann fái aftur kallið í hópinn. Arnar sagði að leikmenn í hópnum séu framar honum í röðinni.
Jóhann hafði áður borið fyrirliðabandið fyrir lið Íslands, en Arnar ræddi ákvörðun sína við 433.is. „Það er hrikalega leiðinlegt með þessa síðustu þrjá glugga fyrir hann. Í íþróttum er oft þannig að þegar einhver er frá, kemur annar inn, og þegar sá nýi stendur sig vel, þá er spurning um sanngirni að kippa þeim út,“ sagði Arnar um málið í Íþróttavikunni á 433.is.
Þjálfarinn sagði einnig á blaðamannafundi í gær að hann hefði ekki rætt við Jóhann um að hann yrði ekki valinn. Margir hafa sett spurningamerki við þessa ákvörðun, þar á meðal sparkspekingurinn Hrafnkell Freyr Ágústsson, sem sagði: „Hörmulegt svar og léleg vinnubrögð, því miður. Reynsluleysi sem landsliðsþjálfari líklega að segja til sín.“
Arnar var spurður hvort hann muni hafa samband við Jóhann nú þegar valið hefur verið opinberað, en hann svaraði: „Það eru ýmsar pælingar sem maður þarf að fara í þegar maður gerist landsliðsþjálfari. Ég reyni að hafa mínar vinnureglur mjög skýrar. Ég er ekki að tilkynna leikmönnum sem voru ekki í síðasta hópi.“
