Flugmaðurinn Gregory Fletcher, sem nauðlenti Douglas Dakota-flugvélinni á Sólheimasandi árið 1973 og bjargaði lífi allra um borð, heimsótti í gær sínar fyrrum heimaslóðir á Ásbrú í Reykjanesbæ.
Fletcher var móttekinn af Pálma Frey Randverssyni, framkvæmdastjóra Kadeco, og Höllu Tómasdóttur, forseta Íslands, ásamt hópi frá Landhelgisgæslunni. Þetta kom fram í tilkynningu.
Fyrir stuttu síðan fór Fletcher í fyrsta skipti aftur að flugvélarflakinu á Sólheimasandi, þar sem blaðamaður Morgunblaðsins fylgdi honum eftir og ræddi um nauðlendinguna og upplifunina að koma aftur á staðinn.
Fletcher bjó á varnarsvæði bandaríska hersins, sem nú ber nafnið Ásbrú, það eina ár sem hann var á Íslandi. Hann eyddi mestu af sínum tíma á herstöðinni, og markmið heimsóknarinnar var að kynna hann aftur fyrir svæðinu, framtíðaruppbyggingu þess og skipulagi.
Pálmi Freyr hélt kynningu á K64 þróunaráætluninni, hlutverki Kadeco og uppbyggingaráformi á Ásbrú. Fletcher sagði Pálma, Höllu og öðrum viðstöddum frá nauðlendingunni á Sólheimasandi og fleiri sögum af veru sinni á Íslandi.
„Það var okkur mikill heiður að fá bæði Fletcher og forseta Íslands til okkar í dag. Fletcher var búsettur hér á svæðinu árum áður, og hefur ásýnd þess breyst töluvert síðan hann bjó hér. Það var bæði dýrmæt og lærdómsrík reynsla að ræða við hann, og mikil hvatning fyrir okkar vinnu að heyra hversu mikla trú hann hefur á framtíðaruppbyggingu svæðisins og þeim tækifærum sem leynast hér í nágrenninu við flugvöllinn,“ sagði Pálmi í tilkynningunni.
Fyrir tæpu ári síðan skrifuðu Kadeco, Reykjanesbær og íslenska ríkið undir samning um uppbyggingu á Ásbrú. Samningurinn felur meðal annars í sér að byggðar verði 800 íbúðir á Ásbrú, auk uppbyggingar samfélagslegra innviða, almenningsrýma og nýrra bygginga undir þjónustu fyrir íbúa.
