Í vikunni var maður dæmdur í fangelsi í Skotlandi fyrir tvær nauðganir. Maðurinn, sem er á sextugsaldri, hafði flúið land eftir að hafa reynt að láta líta út fyrir að hann hefði tekið sitt eigið líf með því að skilja eftir sig falsað sjálfsvígsbréf.
Lögreglan trúði því ekki að hann hefði í raun tekið eigið líf, en eftir að ábending barst frá Sky News, var rannsókn aftur hafin á málinu. Maðurinn heitir James Clacher og var sakfelldur í síðasta mánuði. Dómur yfir honum var kveðinn upp í vikunni þar sem hann hlaut 10 ára dóm, þar af 8 ár í fangelsi, en síðustu tvö árin mun hann vera undir eftirliti utan fangelsis.
Clacher starfaði áður sem stjórnandi í líkamsræktarstöð. Hann hvarf í maí 2022, þegar konurnar, sem hann nauðgaði, höfðu báðar skilað kærum á hendur honum. Hann skildi eftir bíl sinn við Loch Long, sem er um 40 kílómetra norðvestur af Glasgow, og í bílnum var bréf þar sem hann fullyrti að hann ætlaði að taka sitt eigið líf. Hann skrifaði að konan, sem hann nauðgaði fyrst, myndi ekki hætta fyrr en hann væri dauður eða í fangelsi. Konan segist ekki hafa viljað Clacher feigan heldur að hann færi í fangelsi.
Lögreglan trúði því ekki að Clacher myndi svipta sig lífi og umfangsmikil leit var hafin. Talin var líklegast að hann hefði ekki farið langt og hefði tjaldað í nágrenninu, en hann fannst ekki. Einu og hálfu ári síðar, í nóvember 2023, barst Sky News ábending um að Clacher héldi til í bænum Nerja á Spáni, sem er í nágrenni borgarinnar Malaga. Þar kom fram í ábendingunni að Clacher væri tíð gestur í tiltekinni líkamsræktarstöð í bænum.
Sky News sendi upplýsingarnar til skosku lögreglunnar og var sameiginleg rannsókn lögregluyfirvalda á Spáni, Skotlandi og Bretlandi hafin. Sex mánuðir liðu þar til Clacher var handtekinn af lögreglu á Spáni, en þá var hann í miðjum æfingum á ströndinni. Í Nerja hafði Clacher komið sér vel fyrir, gekk undir dulnefninu Johnny Wilson, átti í ástarsambandi við konu í bænum, starfaði sem garðyrkjumaður og kenndi jóga á ströndinni.
Eftir handtökuna var hann framseldur til Skotlands. Rannsóknarlögreglumaður sagði að ábendingin, sem barst Sky News, hefði verið lykillinn að því að lögreglan hefði náð að handtaka Clacher. Hann lýsti sig saklausan og sagði að konurnar hefðu veitt samþykki sitt.
Fyrri nauðgunin átti sér stað í ágúst 2019 á heimili konunnar, en sú síðarnefnda í september 2020, þar sem báðar konurnar höfðu kynnst Clacher í stefnumótaforritum. Við dóminn báru tvær aðrar konur vitni og sögðu Clacher hafa áreitt sig kynferðislega með óviðeigandi snertingu, en bæði atvikin áttu sér stað í líkamsræktarstöð. Þær tilkynntu báðar áreitnina til lögreglu, en Clacher hafði þegar verið kærður fyrir báðar nauðganirnar og flúði í kjölfarið.
Í réttarhöldunum kom einnig fram að Clacher hafði logið um aldur sinn á forritunum og um fornafn sitt þegar hann hitti þolanda fyrri nauðgunarinnar. Hann sagði einnig konunni að bróðir hans hefði dáið og hegðaði sér með svipuðum hætti í seinna tilfellinu. Dómari málsins sagði flóttann Clacher merki um heigulshátt og að hann hefði ekki sýnt nein merki um iðrun. Konurnar, sem hann nauðgaði, hafa báðar lýst því að þær hafi brotnað algerlega saman eftir nauðganirnar. Auk fangelsisdómsins var Clacher settur á skrá yfir kynferðisbrotamenn og verður nafn hans á henni ótímabundið.
