Thomas Jacob Sanford, maðurinn sem er sakaður um að hafa ekið bílnum sínum á mormónakirkju í Grand Blanc, Michigan, í gær, lagði eld að kirkjunni og skaut á kirkjugesti, var 40 ára gamall. Sanford, sem oftast var kallaður Jake, var skotinn til bana á bílastæði við kirkjuna.
Yfirvöld hafa staðfest að fjórir hafi látið lífið í árásinni, en óttast er um fleiri fórnarlömb þar sem leitað er að líkamsleifum í rústum kirkjunnar. Samkvæmt upplýsingum frá CNN er allt að sjö enn saknað.
Jake var fyrrverandi hermaður og samkvæmt fjölskylduvini hans hefur hann glímt við áfallastreituröskun (PTSD). „Það er erfitt að finna til með einhverjum sem gerði eitthvað svona hræðilegt, en mér finnst þetta samt leiðinlegt. Ég hef heyrt í gegnum fjölskylduna að hann hafi glímt við PTSD,“ sagði viðkomandi þegar hann talaði við CNN.
Í frétt Mail Online kemur fram að Jake og eiginkona hans hafi verið „íhaldsöm og kristin fjölskylda“ með langveikan son sem fæddist með sjaldgæfan erfðasjúkdóm. Lögreglan hefur ekki gefið út hvaða ástæður lágu að baki árásinni.
Samkvæmt talsmanni U.S. Marine Corps starfaði Sanford sem liðþjálfi og hlaut nokkrar viðurkenningar fyrir þjónustu sína á árunum 2004 til 2008. Á samfélagsmiðlum má sjá myndir af Jake þar sem hann var stuðningsmaður Donald Trump, Bandaríkjaforseta, og á einni mynd sést hann í bol með mynd af Trump og áletruninni „Make Liberals Cry Again“.
Veikindi sonarins virðast hafa haft veruleg áhrif á fjölskylduna, en á árinu 2015 var blásið til söfnunar fyrir hana á vefnum GoFundMe.
