Faxaflóahafnir hafa í dag tilkynnt um samning við Múlakaffi um nýja farþegamiðstöð við Viðeyjarsund. Miðstöðin, sem mun verða 5.500 fermetrar á tveimur hæðum, er hönnuð með útsýni yfir sundið.
Samningurinn felur í sér að Múlakaffi mun annast samkomu- og veisluþjónustu í nýju miðstöðinni á Skarfabakka yfir vetrartímann, utan háannatíma skemmtiferðaskipa. Faxaflóahafnir stefna að því að taka miðstöðina í notkun vorið 2026, til að mæta þörfum fjölda farþega sem koma til Íslands árlega.
Farþegamiðstöðin mun leysa af hólmi tímabundna aðstöðu sem nú er til staðar. „Ný farþegamiðstöð mun gerbylta allri aðstoð og þjónustu við farþega skemmtiferðaskipa sem koma til Reykjavíkur. Miðstöðin mun styrkja starfsemi okkar sem leiðandi höfn í Norður-Atlantshafi og er liður í áframhaldandi sókn okkar að auka hlut skiptifarþega skemmtiferðaskipa sem hefja eða ljúka ferð sinni á Íslandi,“ segir Inga Rut Hjaltadóttir, sviðsstjóri framkvæmdasviðs hjá Faxaflóahöfnum.
