Ölgerðin afhenti í dag Minningarsjóði Bryndiisar Klofu 15 milljónir króna, sem safnaðist með sölu á Kærleiks Kristal. Markmiðið var að styðja við Bryndísarhlið, sem er úrræði fyrir börn og unglinga sem hafa orðið fyrir ofbeldi. Sala Kærleiks Kristals var hluti af kærleiksherferð sem Riddarar kærleikans stóðu fyrir til að styðja uppbyggingu Bryndísarhliðar.
Allur ágóði af sölu Kærleiks Kristals rann í verkefnið, og fyrirtæki eins og Bónus, Króna, Hagkaup, Samkaup og N1 gáfu einnig sinn ágóða af sölu vörunnar. „Kærleiks Kristal fékk frábærar viðtökur sem fóru fram úr okkar björtustu vonum. Það ríkir mikill einhugur um mikilvægi verkefnisins og stuðningur Bónuss, Krónunnar, Hagkaupa og Samkaupa var ómetanlegur í þessari fjáröflun, sem og allra þeirra fyrirtækja sem komu að átakin,“ segir Jóhannes Páll Sigurðarson, vörumerkjastjóri hjá Ölgerðinni.
„Minningarsjóður Bryndísar Klofu og Riddarar kærleikans vilja þakka öllum þeim fyrirtækjum sem komu að þessu mikilvæga átaki og að sjálfsögðu öllum þeim sem keyptu Kærleiks Kristal. Kærleikurinn sem þessi samstaða sýnir er mikill stuðningur við uppbyggingu griðastaðar fyrir börn og ungmenni. Það er von okkar að Bryndísarhlið muni hlúa að öryggi barna um ókomin ár,“ segir Guðrún Inga Sívertsen, formaður Minningarsjóðs Bryndísar Klofu.
Riddarar kærleikans er hreyfing fólks sem heiðrar minningu Bryndísar Klofu með því að virkja kærleikann í samfélaginu, minnka ofbeldi og bæta líðan með opnu samtali og raunverulegum aðgerðum, óháð aldri, uppruna eða bakgrunni. Bryndísarhlið mun verða þjónustumiðstöð og geðheilbrigðisúrræði fyrir börn og ungmenni sem hafa orðið fyrir ofbeldi. Minningarsjóðurinn hefur safnað fyrir húsnæði undir starfsemina síðustu mánuði, og ríkissjóður mun sjá um rekstur Bryndísarhliðar til framtíðar.
