Í dag hefjast réttarhöld í Þýskalandi yfir 28 ára afgönskum mann, Enamullah O., sem er ákærður fyrir að hafa myrt tveggja ára dreng og fertugan karlmann í hnífaárás sem átti sér stað í janúar.
Árásin gerðist í almenningsgarði í Aschaffenburg, þar sem maðurinn réðst á fimm leiksólabörn og tvo kennara þeirra. Í árásinni særðist annar kennarinn og einnig karlmaður á sjötugsaldri sem reyndi að verja börnin.
Sakborningurinn, sem hefur langa sögu andlegra veikinda, er talinn ekki sakhæfur samkvæmt mati sérfræðinga. Saksóknarar ætla að fara fram á að hann fái vistun á viðeigandi stofnun í stað þess að sitja í fangelsi.
Ekki hefur komið í ljós að Enamullah O. hafi verið drifinn af öfgum eða vilja til hryðjuverka. Fljótlega eftir handtökuna kom í ljós að yfirvöld höfðu reynt að senda hann aftur til Bulgaríu, fyrsta Evrópusambandslandsins sem hann kom til á flótta sínum, en mistekist. Hann er einnig grunaður um að hafa ráðist vopnaður hnífi á konu í nágrannabænum Alzenau.
Árásin í Aschaffenburg vakti mikla reiði í samfélaginu og leiddi til harðra pólitískra viðbragða, þar sem nokkrar svipaðar árásir höfðu verið gerðar í mánuðinum áður. Friedrich Merz, leiðtogi stjórnarandstöðunnar og Kristilegra demókrata, lofaði að breyta reglum um hælisleitendur og auka eftirlit við landamæri Þýskalands ef hann yrði kanslari. Viku síðar náði hann með stuðningi hægriflokksins AfD að koma á fót óskuldbindandi þingsályktun sem krafðist þess að stjórnvöld tækju harðari afstöðu í innflytjendamálum.
