Michael Lordson, 25 ára tveggja barna faðir í Nevada, lést þann 5. maí síðastliðinn eftir að hafa komist í snertingu við það baneitraða efni fentanýl. Þetta tilvik hefur vakið mikla athygli þar sem Lordson er talinn hafa óafvitandi snert við eiturefnið eftir að hafa fundið óreyktan kannabisvafning á gangstétt.
Michael starfaði við þrif í Riverside-spilavítið í Laughlin í Nevada. Á þessum örlagaríka degi sendi hann kærustu sinni mynd af vafningnum og sagði henni að í dag „væri happadagurinn“ hans. Eftir þetta sýndi hann samstarfsfélögum sínum vafninginn og kærasta hans segir að hann hafi ætlað að bjóða þeim að reykja með sér eftir vinnu.
Um tveimur klukkustundum síðar fannst hann meðvitundarlaus og lést stuttu síðar. Dánardómstjóri sem framkvæmdi krufningu á líkamsins komst að þeirri niðurstöðu að Lordson hafi látist úr óviljandi fentanýl-eitrun. Fentanýl er afar öflugt verkjalyf sem er notað í litlum skömmtum en hefur á síðari árum verið tengt mörgum dauðsföllum, sérstaklega meðal fíkniefnaneytenda.
Tamula Mercer, amma Michael sem ól hann upp frá tveggja ára aldri, segir að barnabarn hennar hafi ekki neytt eiturlyfja, þó hann hafi stundum reykt gras, þar sem það sé löglegt í Nevada. Hún segir að hann hafi forðast áfengi og öll sterkari efni. Talið er að vafningurinn sem Michael fann hafi innihaldið fentanýl, en ekki liggur fyrir hvort honum hafi tekist að reykja hann eða hvort hann hafi einfaldlega dáið eftir að hafa handleikið hann.
Í frétt frá Mirror kemur fram að Tamula hafi gengið til liðs við samtök sem fræða almenning um hættuna af fentanýli eftir andlát sonarsonar síns. Hún berst fyrir því að koma í veg fyrir fleiri dauðsföll og segir: „Ef við getum bjargað einu lífi, þá get ég litið svo á að dauði Michaels hafi ekki verið til einskis.“
