Lögregla í Antwerpen, Belgíu, handtók í dag þrjá unga menn vegna gruns um að þeir hefðu lagt á ráðin um að framkvæma drónaárás á Bart De Wever, forsætisráðherra, í nafni jihad, hins heilaga stríðs íslamista.
Handtökurnar voru hluti af rannsókn á máli sem beinist að „tilraun til hryðjuverkadráps og þátttöku í starfsemi hryðjuverkahóps,“ að því er Ann Fransen, ríkissaksóknari, greindi frá á blaðamannafundi í dag.
Hún sagði að ákveðin atriði bentu til þess að hinir grunuðu hefðu ætlað sér að framkvæma hryðjuverkaárás á stjórnmálamenn. Þá væri einnig grunur um að mennirnir hefðu reynt að smíða dróna sem gæti flutt sprengiefni.
Maxime Prevot, utanríkisráðherra, lýsti fregnunum sem „reiðarslag“ og lofaði rannsóknarstarfi lögreglu í hástert. Hann sagði að skjótt viðbrögð hefðu fyrirbyggt „hið versta.“ Theo Francken, varnarmálaráðherra, sendi forsætisráðherranum stuðningsyfirlýsingu.
