Kamala Harris, fyrrverandi varaforseti Bandaríkjanna, hefur gefið í skyn að hún gæti hugsanlega boðið sig fram til forseta Bandaríkjanna aftur. Harris, sem tók við af Joe Biden sem forsetaefni Demókrataflokksins fyrir árið 2024, tapaði fyrir Donald Trump í þeirri kosningu.
Í viðtali við breska ríkisútvarpið, BBC, sagði Harris að hún hafi ekki enn tekið ákvörðun um framtíð sína í bandarískum stjórnmálum. Hún benti þó á að hún sé ekki hætt í þeim heimi og að ungar frænkur hennar muni sjá konu sem forseta Bandaríkjanna á sinni lífstíð. „Ég hef ekki enn ákveðið hvað ég mun gera í framtíðinni, umfram það sem ég er að gera núna,“ sagði Harris.
Ummæli hennar eru sterkasta vísbendingin hingað til um að hún kunni að reyna að verða forsetaefni Demókrataflokksins í kosningunum sem fara fram árið 2028. Eftir að hafa gefið út endurminningar sínar í síðasta mánuði hefur hún haldið því fram að það hefði verið kæruleysi að leyfa Biden að bjóða sig fram að nýju fyrir hönd flokksins. Hún hefur einnig sakað starfslið Bidens í Hvíta húsinu um að hafa ekki stutt hana á meðan hún var varaforseti og að hafa að stundum unnið gegn henni.
