Leó XIV hafnaði afdráttarlaust möguleikanum á gervigreindarpáfa í viðtali við ævisöguskrifara Elise Ann Allen í síðustu viku. Viðtalið var tekið fyrir ævisöguna Leó XIV: Heimsborgari, trúboði 21. aldar, sem kom út á spænsku á fimmtudaginn. Hluti þess var birtur af kaþólska fréttamiðlinum Crux.
Í viðtalinu sagði Leó: „Einhver bað nýlega um leyfi til að búa til gervigreindarútgáfu af mér svo að hver sem er gæti skráð sig inn á vefsíðu og fengið persónulega áheyrn hjá páfanum. Þessi gervigreindarpáfi átti að svara spurningum þeirra og ég sagði, ég ætla ekki að heimila þetta.“
Páfi lýsti yfir áhyggjum sínum um að hin ofurríku væru að fjárfesta í gervigreind, en á sama tíma að „hunsa virði manneskju og mannkynsins“. Hann bætti við: „Ef kirkjan leggur ekki orð í belg, eða einhver annar – en kirkjan verður sannarlega að vera ein röddin hérna – er hætta á því að hinn stafræni heimur fari eigin leið og að við verðum peð eða skilin eftir við vegarkantinn.“
Páfi tók fram að gervigreind hefði verið eitt af þeim málefnum sem hann hugsaði um þegar hann valdi sér páfanafnið Leó. Nafnið var valið til heiðurs Leó XIII, sem samdi umburðarbréfið Rerum novarum árið 1891. Í því bréfi var fjallað um kjör verkamanna á tíma iðnbyltingarinnar á 19. öld og fyrirmæli veitt um hvernig skyldi bæta samband launþega og vinnuveitenda.
Núverandi páfi lýsti gervigreindinni sem nýrri iðnbyltingu í einu fyrsta ávarpi sínu til kardínála. Í viðtalinu áréttaði hann að hann væri ekki á móti tækniframförum, en að honum litist ekki á blikuna eins og er. „Ég tel að með því að glata þessu sambandi verði vísindin eins og innantóm, köld skel sem vinnur gríðarlegan skaða á því sem mannkynið snýst um. Og að mannshjartað týnist í miðju tækniþróunar eins og framvindan er núna.“
