Lettneska þingið hefur samþykkt að segja landið úr Istanbúlsamningnum, fyrsta bindandi alþjóðasamningi sem miðar að því að draga úr kynbundnu ofbeldi. Þingið samþykkti samninginn í nóvember í fyrra, en ef tillagan fær undirskrift Edgars Rinkevics, forseta landsins, mun Lettland verða fyrsta ríkið innan Evrópusambandsins sem gerir þetta.
Aðalástæðan fyrir því að þingið vill segja sig úr samningnum er sögð vera að hann stuðli að „kynjakenningum“. Atkvæðagreiðslan fór fram í dag þar sem 56 þingmenn greiddu atkvæði með tillögunni, 32 á móti og tveir sátu hjá. Ríkisstjórn Eviku Silina, forsætisráðherra, er klofin í málinu. Fulltrúar Sambands græningja og bændaflokksins greiddu atkvæði með því að yfirgefa samninginn, en flokkar Silinu og Framsóknarflokkurinn greiddu atkvæði á móti. Hægrisinnaðir stjórnarandstöðuflokkar studdu hins vegar tillöguna.
Tillagan þarf nú undirskrift forseta Lettlands. Rinkevics hefur gefið í skyn að hann sé ekki fylgjandi því að segja landið úr samningnum, en hefur einnig sagt að hann muni ekki hnekkja ákvörðun þingsins. Istanbúlsamningurinn var samþykktur á vettvangi Evrópuráðsins þann 11. maí 2011 og krefst þess að aðildarríki þrói lög og stefnur sem miða að því að binda enda á heimilisofbeldi og ofbeldi gegn konum.
Þeir sem vilja segja Lettland úr samningnum halda því fram að það muni ekki veikja baráttuna gegn kynbundnu ofbeldi þar sem landslög séu þegar fullnægjandi. Kvenréttindasamtök hafa skipulagt mótmælaaðgerðir í Ríga, höfuðborg Lettlands, á undanförnum vikum. „Fullgilding Istanbúlsamningsins í Lettlandi hefur skilað umtalsverðum árangri, sem eru ekki bara orð á blaði, heldur manns lífum sem hefur verið bjargað,“ segir MARTA, miðstöð sem berst fyrir réttindum kvenna og innflytjenda.
Auk þess hafa hægri stjórnarandstöðuflokkar í Lettlandi einnig lagt fram nýja tillögu að lagabreytingu sem myndi takmarka aðgengi að þungunarrofi í landinu. Í Istanbúlsamningnum er meðal annars tekið á nauðgunum, kynferðisofbeldi innan jafnt sem utan hjónabands, kynfæralimlestingu, mansali, ofsóknum gegn hinsegin fólki, heimilisofbeldi og fjölmörgum öðrum kynbundnum ofbeldisverkum. Ísland fullgildi samninginn árið 2018.
