Daði Már Kristófersson, fjármálaráðherra, lýsti því yfir að óveðurský væri yfir ferðaþjónustunni á Íslandi. Hann sagði ríkisstjórnina vinna að tillögum um gjaldtöku ferðamanna í samhæfingu við ferðaþjónustuna.
Þetta kom fram í svari ráðherrans við fyrirspurn Sigmundar Davíðs Gunnlaugssonar, formanns Miðflokksins, í óundirbúnum fyrirspurnartíma á Alþingi í dag. Sigmundur spurði um áform stjórnvalda um skattahækkanir og hvort ráðherrann hygðist halda áfram að hækka skatta og álögur á ferðaþjónustuna í ljósi breyttra aðstæðna, meðal annars vegna gjaldþrots flugfélagsins Play.
„Hyggst ráðherrann í engu taka tillit til þessara breytinga og breyttra aðstæðna og milda höggið gagnvart ferðaþjónustunni?“ spurði Sigmundur.
Daði svaraði að hægt væri að beita ríkisfjármálunum á tvo vegu til að styðja við vegferð Seðlabankans, annars vegar með því að draga úr þenslu og hins vegar með því að hækka skatta. „Varðandi ferðaþjónustuna sérstaklega þá tek ég undir að það eru óveðursský í kringum hana. Ríkisstjórnin hefur verið að vinna að tillögum í sátt og samtali við ferðaþjónustuna um breytingu á gjaldtöku af ferðamönnum. Í þeirri vinnu er tekið tillit til hvernig þessi staða hefur þróast og við munum að sjálfsögðu taka tillit til hennar eins og hún þróast áfram,“ sagði Daði.
Sigmundur svaraði með því að benda á að þetta væri alltaf sami söngurinn. „Við erum að fylgjast með þessu og við munum taka tillit til hlutanna þegar þeir koma í ljós. Þeir eru að koma í ljós og ég er að spyrja um viðbrögð, ekki það hvort hæstvirtur ráðherra sé að fylgjast með.“
Sigmundur óskaði einnig svara við því hvort ríkisstjórnin hygðist reyna að beita sér fyrir því að Ísland komist að einhverju leyti „út úr þeim ógöngum sem við erum lent í með auknum kolefnissköttum Evrópusambandsins á samgöngur við landið, flug og siglingar.“
Daði tók fram að varðandi kolefnisgjöldin væri það þannig að Ísland, sem þátttakandi í alþjóðlegum kerfum, væri að gera vel út. „Við verðum að átta okkur á því að þegar þessi gjöld eru lögð á og við veljum að taka þátt í kerfunum þá erum við að spila inn í þann styrkleika íslensks atvinnulífs að kolefnislosun hér er lítil,“ sagði Daði og hélt áfram: „Þegar lögð eru kolefnisgjöld almennt, t.d. á orkuframleiðslu í heiminum, þá þýðir það að samkeppnisstaða íslenskra fyrirtækja gagnvart samkeppnisaðilum erlendis batnar en versnar ekki. Við þurfum þess vegna að skoða hagsmuni þessa í heild sinni.“
