Refsiaðgerðir Sameinuðu þjóðanna gegn Íran tóku gildi í gærkvöld eftir að Bretland, Frakkland og Þýskaland virkjuðu tiltekin ákvæði úr kjarnorkusamningi ríkjanna frá árinu 2015. Efnahagsþvingunum hafði verið aflétt samkvæmt samkomulaginu, en þær taka sjálfkrafa aftur gildi við virkjuð ákvæði, ef Íranar uppfylla ekki skuldbindingar sínar.
Bandaríkin, sem sögðu upp aðild að kjarnorkusamningnum á fyrra kjörtímabili Donalds Trump forseta árið 2019, höfðu þegar hafið efnahagsþvinganir gegn Íran að nýju. Aðgerðirnar beinast að fyrirtækjum, samtökum og einstaklingum sem hafa lagt eitthvað af mörkum til kjarnorkuáætlunar Írans og þróunar íranskra eldflauga.
Aðgerðirnar fela í sér bann við sölu og flutningi vopna og kjarnorkutækjabúnaðar til Írans, frystingu eigna íranskra lögaðila tengdum kjarnorkuáætluninni erlendis og ferðabann gegn einstaklingum sem taldir eru hafa brotið gegn ákvæðum samkomulagsins. Með aðgerðunum eru aðildarríki Sameinuðu þjóðanna skylduð til að setja höft á banka- og fjárfestingarstarfsemi sem gæti eflt kjarnorkuáætlun Írans.
Þar sem refsiaðgerðirnar eru hluti af ályktun öryggisráðs Sameinuðu þjóðanna eru þær bindandi að lögum. Engu að síður eru miklar líkur á því að bandamenn Írans sneiði hjá þeim. Til þess að aðgerðirnar komist í framkvæmd þarf hvert ríki að binda þær í lög, og talið er að Rússland muni ekki gera það. Hins vegar er óljóst hvort Kína, sem flytur inn töluvert magn af olíu frá Íran, muni fara eftir aðgerðunum.
