Þegar útgerðarfélagið Gjógur tók nýtt skip, Hákoni ÞH 250, í notkun, var ákveðið að kaupa nýjustu gerð fjarstýrðra hlera frá Thyborøn. Hlerarnir eru af tegund 42, 12 m² að stærð og 4.700 kg að þyngd. Þetta eru fyrstu hlerarnir af þessari tegund sem fara á íslenzkt skip.
Nú, tæpu ári síðar, er reynslan af þeim jákvæð í alla staði. Jón Þór Björnsson, skipstjóri á Hákoni ÞH 250, lýsir hlerunum sem langbestu hlerum sem hann hefur dregið. „Þeir eru stöðugir í köstum og hífingum, liprir í allri vinnslu og ótrúlega léttir í drætti miðað við þyngd,“ segir hann.
Hann bætir við að hlerarnir séu einnig sterkir og endingargóðir – „þetta er alvöru járn, ekkert pjatúr“ – og að þeir komi alltaf réttir upp. „Það er frábært að vinna með þá og ég held að þeir muni endast vel enda sé ekki á þeim eftir tæpa árs notkun,“ segir Jón Þór.
Í fyrstu mánuðina voru hlerarnir notaðir án stýribúnaðar, og sýndu þeir sig strax sem traustur og lipur búnaður sem auðveldaði alla vinnu. „Við vorum strax ánægðir, þeir komu alltaf réttir og voru fljótir í skver,“ útskýrir hann.
Stýribúnaðurinn sem fylgir hlerunum er, samkvæmt Jóni Þóri, stærsta skrefið. Allur búnaðurinn og hugbúnaðurinn eru hannaðir og framleiddir af Thyborøn, og með honum er hægt að breyta stöðu og virkni hleranna úr brúnum á meðan á veiðum stendur. Hann segir þetta vera „algjöra byltingu“ og bendir á að ekki hafi verið mistök í veiðunum í allt sumar þrátt fyrir krappar beygjur.
Jón Þór segir að þessi tækni hafi aukið skilvirkni veiðarfæranna verulega. „Hlerarnir halda veiðarfærunum stöðugum í beygjum og trollið er alltaf réttara aftan í. Ég er laus við áhyggjur. Mistog og skekkja eru minni og það fer betur með veiðarfærin,“ útskýrir hann.
Ákvörðunin um að fjárfesta í fjarstýrðum hlerum á Hákoni ÞH 250 var tekin eftir mikla yfirlegu og ítarlega skoðun á mörgum valkostum. „Við vorum með ýmislegt á borðinu, en ég sé ekki eftir þessu vali,“ segir skipstjórinn og hrósar um leið tækniþjónustunni. „Það nægir eitt símtal og aðstoðin er komin.“
Í dag eru um 40 skip með fjarstýrða hlera frá Thyborøn víðsvegar um heiminn. Hampiðjan Ísland er umboðsaðili Thyborøn á Íslandi og sá um sölu hleranna til Gjógurs.
