Guðrún Hafsteinsdóttir, formaður Sjálfstæðisflokksins, lýsir bilun í álveri Norðuráls á Grundartanga sem alvarlegu áfalli fyrir fyrirtækið og nærsamfélagið. Hún heldur því fram að bilunin, sem hefur leitt til þess að álverið starfar aðeins á þriðjungs afköstum, muni kosta þjóðarbúið tugi milljarða króna. Þetta kom fram í ræðu Guðrúnar um störf þingsins í dag, þar sem hún óskaði eftir sérstakri umræðu við forsætisráðherra um stöðu efnahagsmála.
Guðrún sagði að bilunin væri ekki aðeins alvarlegt áfall fyrir Norðurál, heldur líka fyrir allt nærsamfélagið. „Framleiðsla og afkastageta hefur skerst um tvo þriðju um óákveðinn tíma. Þetta hefur gríðarleg áhrif á fólk og fyrirtæki, og þarna munu tapast útflutningstekjur upp á tugi milljarða,“ sagði hún.
Hún benti á að víða sé að verða breyting á efnahagsástandinu sem ríkisstjórnin þurfi að bregðast við. „Loðnuveiði er óviss, horfur í kolmunna og makríl eru daprar, kísilver PCC á Bakka er lokað tímabundið. Um 600 manns hafa misst vinnuna eftir gjaldþrot Play og nú liggur hluti starfsemi Norðuráls niðri. Hvernig verjum við verðmætasköpunina í landinu, störfin og traust heimilanna?“ spurði Guðrún.
