Jón Þór Þorvaldsson, formaður Félags íslenskra atvinnuflugmanna (FIÁ), tjáði sig um flugfélagið Play í viðtali við Bylguna á dögunum. Hann lýsti áhyggjum sínum yfir mögulegu gjaldþroti félagsins, auk þess sem hann vakti athygli á stöðu starfsmanna.
Í samtalinu kom fram að Play væri að selja flugferðir sem ekki yrðu flognar. Jón Þór nefndi að fyrirtækið hygðist skila inn íslensku flugrekstrarleyfi sínu og einblína á sólarlandaferðir frá Íslandi. Með þessu væri félagið að flytja sig úr landi til að ráða inn starfsmenn á lægri launum.
„Hvað verður Play þá í kjölfarið? Ferðaskrifstofa, farmiðasala. Hver verður ábyrgðin gagnvart neytendum?“ spurði Jón Þór. Mbl.is leitaði til hans og bað um frekari skýringar á því að verið væri að selja ferðir sem ekki yrðu flognar. „Það sem ég var að vísa til er fyrst og fremst sú staðreynd að ef/þegar flugrekstrarleyfi Play verður skilað inn, þá verða þær flugferðir sem verið er að selja í nafni þess flugfélags ekki flognar af því flugfélagi,“ sagði Jón Þór í samtali við mbl.is.
Hann útskýrði að þegar flugrekstrarleyfinu yrði skilað, breytist ábyrgð og eðli fyrirtækisins Play. „Þá má velta fyrir sér hversu viðurhlutamikla ábyrgð forsvarsmenn Play á Íslandi ætla sér að bera gagnvart neytendum sem kaupa ferðir og pláss fyrir vöruferðir?“ spyr Jón Þór. „Hver verður ábyrgðin gagnvart yfirvöldum og ekki síst gagnvart starfsfólki? Ætla forsvarsmenn Play að bjóða núverandi starfsfólki Play, einkum flugmönnum og flugfreyjum, núverandi kjör þegar fólk fer að starfa á maltnesku flugrekstrarleyfi?“
„Þannig stendur fullyrðing mín. Flugferðir sem nú eru í sölu, verða, eftir að flugrekstrarleyfi Play á Íslandi verður skilað inn, ekki flognar af því flugfélagi,“ sagði Jón Þór.
Birgir Olgeirsson, fjölmiðlafulltrúi Play, vildi árétta að þó að Play skili inn íslensku flugrekstrarleyfi sínu, þá verði ferðir Play flognar óháð því hvar leyfið er staðsett. Frettin hefur verið uppfærð.
