Hrefna Dögg Gunnarsdóttir, lektor við Lagadeild Háskóla Íslands, hefur fengið styrk að upphæð tæplega þriggja milljóna dala, sem jafngildir um 360 milljónum króna, frá alþjóðlega rannsóknarsjóðnum Wellcome Trust.
Styrkurinn rennur til rannsóknarverkefnis sem nefnist „Fostering Reciprocity in Environmental DNA science through Yielded stewardship, Just benefit, and Accountability“ (FREYJA). Markmið FREYJA er að stuðla að betri gagnkvæmni í vísindarannsóknum, sérstaklega þegar kemur að sanngjarnri skiptingu ávinnings sem leiðir af nýtingu vísindaniðurstaðna og gagnavinnslu í umhverfiserfðafræði.
Verkefnið leggur sérstaka áherslu á samstarf vísindamanna og frumbyggjasamfélaga. Þannig er unnið að því að tryggja að rannsóknir séu ekki einungis í þágu vísindanna sjálfra, heldur einnig að þau samfélög sem að þeim koma njóti ávinningsins.
Umhverfiserfðafræði snýst um að safna erfðaefni lífvera úr umhverfinu, eins og jarðvegi, sjó og lofti, í stað þess að sækja það beint úr lífverunni sjálfri. Þessi aðferð er talin hafa mikil áhrif á framleiðslu matvæla, lyfja og snyrtivara, sem gæti leitt til bættrar velferðar fyrir jarðina og mannkynið.
Hrefna Dögg er aðalrannsakandi og styrkhafi verkefnisins. Hún hefur á undanförnum árum rannsakað lagalegar kröfur sem tengjast vísindarannsóknum á heilbrigðissviði, þar á meðal hvernig tryggja megi gagnkvæmni gagnvart samfélögum í tengslum við aðgang að heilbrigðisgögnum. Nánari upplýsingar um verkefnið má finna á vef Háskóla Íslands.
